နိုင်ငံရေးပါတီတည်ထောင်လိုသူများက ယင်းတို့တည်ထောင်လိုသောပါတီအမည်ကိုဖော်ပြ၍          ပြည်ထောင်စုရွေး ကောက်ပွဲကော်မရှင်သို့ လျှောက်ထားလျက်ရှိကြရာ ယနေ့အထိ ပါတီတည်ထောင်ခွင့် လျှောက်ထားလာသည့်အဖွဲ့ ၂၇ ဖွဲ့ရှိပြီး ယင်းသို့ လျှောက်ထားသည့်အဖွဲ့များအနက် ရခိုင်တိုင်းရင်းသားများပါတီ(Rakhine Nationalities Party)သည် နိုင်ငံရေးပါတီများ မှတ်ပုံတင်ခြင်းဥပဒေ၊ နည်းဥပဒေများနှင့်ညီညွတ်ကြောင်း စိစစ်တွေ့ရှိရသဖြင့် ကော်မရှင်က ယနေ့တွင် နိုင်ငံရေးပါတီတည်ထောင်ခွင့် လျှောက်ထားချက်ကို ခွင့်ပြုလိုက်ကြောင်း သိရသည်။

ပါတီတည်ထောင်ခွင့်ရရှိသော ရခိုင်တိုင်းရင်းသားများပါတီ (Rakhine Nationalities Party) သည် ခွင့်ပြုချက်ရရှိသည့်နေ့မှစ၍ ရက်ပေါင်း ၃၀ အတွင်း နိုင်ငံရေးပါတီများ မှတ်ပုံတင်ခြင်း နည်းဥပဒေ ၇ နှင့်အညီ ကော်မရှင်သို့ နိုင်ငံရေးပါတီအဖြစ် မှတ်ပုံတင်ပေးပါရန် လျှောက်ထားရမည်ဖြစ်သည်။ ယနေ့အထိ နိုင်ငံရေးပါတီ ၁၇ ပါတီကို တည်ထောင်ခွင့်ပြုပြီးဖြစ်သည်။

အဆိုပါ တည်ထောင်ခွင့်ပြုပြီး နိုင်ငံရေးပါတီ ၁၇ ပါတီအနက် ဦးဘွာလ်ဆိုင်လို ခေါင်းဆောင်သည့် ချင်းပြည်သစ်ကွန်ဂရက်ပါတီ [New Chinland Congress(NCC)]က ပါတီ တည်ထောင်ခွင့်ပြုသည့် နေ့ရက်မှစ၍ ရက်ပေါင်း ၃၀ အတွင်း နိုင်ငံရေးပါတီများ မှတ်ပုံတင်ခြင်း နည်းဥပဒေ ၇ နှင့်အညီ ကော်မရှင်သို့ ယနေ့တွင် နိုင်ငံရေးပါတီအဖြစ် မှတ်ပုံတင်ပေးပါရန် လျှောက်ထားလာသည်။

ယင်းသို့ မှတ်ပုံတင်ခွင့်ပြုရန် လျှောက်ထားသည့် နိုင်ငံရေးပါတီ ၁၆ ပါတီအနက် ပါတီ ၁၄ ပါတီကို မှတ်ပုံတင်ခွင့်ပြုခဲ့ပြီး ကျန်ပါတီများကို မှတ်ပုံတင်ခွင့်ပြုနိုင်ရေး ပြည်ထောင်စုရွေးကောက်ပွဲကော်မရှင်က ဆက်လက်စိစစ်ဆောင်ရွက်လျက်ရှိကြောင်း သိရသည်။

သတင်းစဉ်

ပြည်တွင်း/ပြည်ပကုန်စည်ပြပွဲ လုပ်ထုံးလုပ်နည်းနှင့် စည်းမျဉ်းစည်းကမ်းများဆိုင်ရာ အလုပ်ရုံဆွေးနွေးပွဲ မိတ်ဆက်ပွဲအခမ်းအနားကို ၂၀၂၅ ခုနှစ်၊ ဇွန်လ (၈) ရက် ၊ နံနက် (၉:၀၀) နာရီ အချိန်တွင် ရန်ကုန်မြို့၊ UMFCCI အစည်းအဝေးခန်းမ၊တတိယထပ်၌ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မြန်မာကုန်သွယ်မှုမြှင့်တင်ရေးအဖွဲ့နှင့် မြန်မာနိုင်ငံကုန်စည်ပြပွဲနှင့်ဆွေးနွေးပွဲများ ဆိုင်ရာလုပ်ငန်းအသင်းတို့ ပူးပေါင်းကျင်းပပြုလုပ်ခဲ့ကြောင်း သိရသည်။ ပြည်တွင်း/ပြည်ပကုန်စည်ပြပွဲ လုပ်ထုံးလုပ်နည်းနှင့် စည်းမျဉ်းစည်းကမ်းများဆိုင်ရာ အလုပ်ရုံဆွေးနွေးပွဲ မိတ်ဆက်ပွဲအခမ်းအနားတွင်  အစီအစဉ်အရ  မြန်မာကုန်သွယ်မှုမြှင့်တင်ရေးအဖွဲ့၊  ညွှန်ကြားရေးမှူးချုပ်  ဒေါက်တာထိန်လင်း၊  ညွှန်ကြားရေးမှူး ဒေါက်တာသက်လွင်ဦးနှင့် မြန်မာနိုင်ငံ ကုန်စည်ပြပွဲနှင့်ဆွေးနွေးပွဲများဆိုင်ရာလုပ်ငန်းအသင်းဥက္ကဌ ဦးမင်းသိန်းတို့က အဖွင့်အမှာစကားများ ပြောကြားခဲ့သည်။ ထို့နောက် တရုတ်အာဆီယံ ကုန်စည်ပြပွဲအတွင်းရေးမှူးရုံး၊ ဒုတိယအတွင်းရေးမှူးချုပ် မစ္စတာ လျှန်ရိကွမ်း က (၂၂)ကြိမ်မြောက် တရုတ်အာဆီယံကုန်စည်ပြပွဲကျင်းပမည့် အစီအစဉ်များနှင့်ပတ်သက်၍ ရှင်းလင်းဆွေးနွေးခဲ့ပြီး ပြည်ထောင်စုသမ္မတမြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များ အသင်းချုပ်၊ ဒုတိယ ဥက္ကဋ္ဌ ဦးမြဟန်မှ UMFCCI နှင့်ညီနောင်အသင်းအဖွဲ့များအနေဖြင့် (၂၂)ကြိမ်မြောက် တရုတ်အာဆီယံ ကုန်စည်ပြပွဲတွင် ပူးပေါင်းပါဝင်နိုင်မည့် အခြေအနေများကို ဆွေးနွေးခဲ့သည်။

ထို့နောက် TGT Tea Co.,Ltd မှ Managing Director ဦးမောင်လွင်မှ တရုတ်-အာဆီယံ ကုန်စည်ပြပွဲတွင် ပါဝင်ပြသခဲ့သည့် အတွေ့အကြုံများကို ရှင်းလင်းဆွေးနွေးခဲ့ပြီး တက်ရောက်လာသူများ၏ မေးမြန်းချက်များကို တာဝန်ရှိသူများက ပြန်လည်ရှင်းလင်းဖြေကြားခဲ့ကြပါသည်။ အဆိုပါ ကုန်စည်ပြပွဲ မိတ်ဆက်ပွဲအခမ်းအနားသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံး၊ တရုတ် အာဆီယံကုန်စည် ပြပွဲ အတွင်းရေးမှူးရုံး၊ UMFCCI နှင့် ညီနောင်အသင်းအဖွဲ့များမှ ကိုယ်စားလှယ်များနှင့် စိတ်ပါဝင်စားသည့် ကုန်သည်လုပ်ငန်းရှင်များ စုစုပေါင်း (၄၂) ဦး ခန့် တက်ရောက်ခဲ့သည်။

(၂၂)ကြိမ်မြောက် တရုတ်-အာဆီယံကုန်စည်ပြပွဲကို တရုတ်ပြည်သူ့သမ္မတနိုင်ငံ၊ ကွမ်ရှီး(ကျွမ့်) ကိုယ်ပိုင်အုပ်ချုပ်ခွင့်ရဒေသ၊ နန်နင်းမြို့၌ ၂၀၂၅ ခုနှစ်၊ စက်တင်ဘာလ ၁၇ ရက်နေ့ မှ ၂၁ ရက်နေ့အထိ ကျင်းပပြုလုပ်သွားမည်ဖြစ်ရာ မြန်မာနိုင်ငံအနေဖြင့် ကုန်စည်ပြပွဲ၏ ဂုဏ်ထူးဆောင်နိုင်ငံ Country of Honor အဖြစ် ဆောင်ရွက်သွားမည်ဖြစ်ပြီး မြန်မာနိုင်ငံ၏ နှစ်လိုဖွယ်ရာမြို့ပြခန်းဆောင် City of Charm နှင့် ကုန်စည်ပြခန်းဆောင်တို့ကို ပါဝင်ပြသသွားမည်ဖြစ်ကြောင်း သိရှိရသည်။

မြန်မာနိုင်ငံမီးသတ်တပ်ဖွဲ့အနေဖြင့် စင်ကာပူနိုင်ငံ၌ ၂၀၂၅ ခုနှစ်၊ နိုဝင်ဘာလအတွင်း ကျင်းပမည့် နိုင်ငံတကာမီးသတ်စွမ်းရည်ပြိုင်ပွဲတွင် နိုင်ငံကိုယ်စားပြုအနေဖြင့် ပါဝင်ယှဉ်ပြိုင်သွားမည်ဖြစ်ကြောင်း မြန်မာနိုင်ငံမီးသတ်ဦးစီးဌာနမှ သိရသည်။

အဆိုပါပြိုင်ပွဲသို့ ဝင်ရောက်ယှဉ်ပြိုင်နိုင်ရန်အတွက် တိုင်းဒေသကြီးနှင့်ပြည်နယ်များရှိ ထူးချွန်သည့် မီးသတ်တပ်ဖွဲ့ဝင်(၁၀) ဦးကို စိစစ်ရွေးချယ်ကာ စခန်းသွင်း လေ့ကျင့်သွားမည်ဖြစ်သည်။

ယင်းပြိုင်ပွဲတွင် တစ်ဦးချင်းစွမ်းရည်ပြိုင်ပွဲနှင့် အဖွဲ့အလိုက်စွမ်းရည်ပြိုင်ပွဲများကို ယှဉ်ပြိုင်ကြရမည်ဖြစ်ပြီး မြန်မာနိုင်ငံမီးသတ်တပ်ဖွဲ့အနေဖြင့် ၂၀၂၃ ခုနှစ်က စင်ကာပူနိုင်ငံ၌ ကျင်းပခဲ့သည့် နိုင်ငံတကာ မီးသတ်စွမ်းရည်ပြိုင်ပွဲတွင် ပထမဆုံးအကြိမ်အဖြစ် ပါဝင်ယှဉ်ပြိုင်ခဲ့ရာ တစ်ဦးချင်း စွမ်းရည်ပြိုင်ပွဲတွင် တတိယဆု ရရှိခဲ့သည်။

ထို့ပြင် ၂၀၂၄ ခုနှစ်တွင် မလေးရှားနိုင်ငံ၌ ကျင်းပခဲ့သည့် မော်တော်ယာဉ်မတော်တဆမှုဖြစ်စဉ် ကယ်ဆယ်ရေးစွမ်းရည်ပြိုင်ပွဲတွင် မြန်မာနိုင်ငံမီးသတ်တပ်ဖွဲ့က Best Team Leader ဆုကို ရရှိခဲ့ကြောင်း  သိရသည်။

ရှမ်းပြည်နယ်မြောက်ပိုင်း၊  သီပေါမြို့၊  မဟာမြတ်မုနိဘုရားကြီးဝင်းအတွင်းရှိ  သီတဂူစက္ခုဒါနဆေးရုံကြီးကို   ယခုလဇွန် (၁၂) ရက်မှစတင်ကာ အခမဲ့ဖွင့်လှစ်ကုသပေးသွားမည်ဖြစ်ကြောင်း သိရသည်။ 

သီပေါ သီတဂူစက္ခုဒါနဆေးရုံကြီးတွင် လျှပ်စစ်မီးဖြင့် အသုံးပြုရသည့် ခွဲခန်းသုံးအဝတ်များ၊ ခွဲစိတ်ကိရိယာများပေါင်းရန်ပေါင်းအိုး (၅)လုံး၊ မျက်စိခွဲစိတ်စက် (၅)လုံး၊ မျက်စိရောဂါရှာဖွေသည့် စက်က (၄)လုံး ၊ မျက်စိရေချိန်တိုင်းစက် (၃)လုံး ၊ ခွဲစိတ်ပြီး မျက်စိအတွင်းထည့်ရန် မှန်ဘီလူး တိုင်းစက် (၂)လုံး၊ လေအေးပေးစက် (၁၈)လုံးရှိပြီး လက်ရှိတွင် သန့်ရှင်းရေးများဆောင်ရွက်လျက်ရှိကြောင်း သိရသည်။

အဆိုပါ ဆေးရုံကြီးအား သီတဂူဆရာတော်ဘုရားကြီးက (၂၀၀၈) ခုနှစ်အတွင်း ဦးစီးဖွင့်လှစ်ပေးခဲ့ခြင်းဖြစ်ပြီး ဆေးရုံကြီးအား ကျပ်သိန်း(၁,၃၃၃)ခန့် ကုန်ကျခံဆောက်လုပ်ခဲ့ခြင်းလည်း ဖြစ်သည်။ ကိုဗစ် – ၁၉ ရောဂါကာလစတင်သည့် အချိန်မှစတင်၍ စမ်းသပ်ခွဲစိတ်ကုသပေးမှုများအား ယာယီရပ်ဆိုင်းခဲ့ပြီး ၂၀၂၂ ခုနှစ်၊ မေလမှစတင်၍ တစ်နှစ်လျှင် တစ်ကြိမ်ပြန်လည်အခမဲ့ဖွင့်လှစ် ခွဲစိတ်ကုသပေးခဲ့ခြင်းဖြစ်ကြောင်း သိရသည်။

နန်းတွင်းမဟာဂီတများကို ပြန်လည်စုစည်းပြီး ယူနက်စကို တင်သွင်းနိုင်ရန်အတွက် ဆက်လက်လုပ်ဆောင်သွားမည်ဟု ဂီတမြို့ Music City Myanmar ၏ တည်‌ထောင်သူ ထပ်ဆင့် အကယ်ဒမီ ဓီရာမိုရ်မှ ပြောကြားခဲ့သည်။ 

မဟာဂီတကို ကမ္ဘာ့အမွေအနှစ်စာရင်း တင်သွင်းနိုင်ရန် မြန်မာ့ယဉ်ကျေးမှုအမွေအနှစ် ထိန်းသိမ်းစောင့်ရှောက်ရေးအဖွဲ့က ဆောင်ရွက်မည်ဖြစ်ပြီး လက်ရှိတွင် မဟာဂီတသီချင်း တော်တော်များများကို စုထားနိုင်ပြီဖြစ်သည်ဟု သိရသည်။ နန်းတွင်းခေတ်ကတည်းက ရှိခဲ့သည့် သီချင်းများဖြစ်သော မဟာဂီတသည် ယခုနောက်ပိုင်း မြန်မာနိုင်ငံတွင် ဖျော်ဖြေရန် အခွင့်အလမ်းနည်းလာပြီး မဟာဂီတကို မပျောက်ပျက်အောင် ထိန်းသိမ်းစောင့်ရှောက်နိုင်ရန် ယခုကဲ့သို့ ဆောင်ရွက်ရတာ ဖြစ်သည်ဟု ထပ်ဆင့်အကယ်ဒမီ ဓီရာမိုရ်က ဆက်လက်ပြောကြားခဲ့သည်။ မဟာဂီတသီချင်းများသည် ကမ္ဘာတွင် အများနှင့်မတူသည့် သံစဉ်များဖြစ်သည့်အတွက် ကမ္ဘာ့အမွေအနှစ်စာရင်း ဝင်နိုင်ခဲ့လျှင် ကမ္ဘာက မြန်မာနိုင်ငံတွင် ကောင်းမွန်သည့် ဂီတရှိသည်ကို သိရှိပြီး ဝိုင်းဝန်းထိန်းသိမ်းကြမည်ဆိုပါက အကျိုးကျေးဇူးများစွာ ရရှိမှာဖြစ်သည်ဟု ဆိုသည်။ မြန်မာတို့၏ ဆို၊ က၊ ရေး၊ တီး ကဏ္ဍတွင် ဂီတသည် အနုပညာရိုးရာ ဖော်ထုတ်ရာတွင် အသက်ဖြစ်သည်ဟု သိရသည်။ ထီးနန်းစဉ်လာ မဟာဂီတဆိုင်ရာ သီချင်းများတွင် သားချော့တေးများကို ဝိမ္ဗာသားကျူး၊ ဝိမ္ဗာလွှဲချင်း၊ ဧယဉ်တော်ကျူး စသည်ဖြင့် ခေါ်ဆိုကြသည်ဟု သိရသည်။ ယူနက်စကိုသည် နိုင်ငံအသီးသီး၏ ဒြပ်မဲ့ယဉ်ကျေးမှုများကို ကာကွယ်ထိန်းသိမ်း စောင့်ရှောက်နိုင်ရန် ကမ္ဘာ့ဒြပ်မဲ့ ယဉ်ကျေးမှုအမွေအနှစ် ကော်မတီကို ၂၀၀၃ ခုနှစ်တွင် ဖွဲ့စည်းခဲ့ပြီး မြန်မာနိုင်ငံက ၂၀၁၃ ခုနှစ်၌ အဆိုပါ ကွန်ဗင်းရှင်းကို ပါဝင်လက်မှတ်ရေးထိုးခဲ့သည်။ 

Credit: Music City Myanmar

အခြားဒေသများတွင်လည်း ပုံစံတူ လိုက်လံပြုလုပ်နိုင်မည့် ခရီးသွားစံပြကျေးရွာတစ်ရွာကို နေပြည်တော်တွင် စတင်ဖွင့်လှစ်လည်ပတ်သွားမည်ဖြစ်ကြောင်း မြန်မာနိုင်ငံခရီးသွားလုပ်ငန်း အဖွဲ့ချုပ်မှ ဒုတိယဥက္ကဋ္ဌ ဦးနောင်းနောင်းဟန်က ပြောကြားခဲ့သည်။ 

အဆိုပါကျေးရွာမှာ နေပြည်တော်ကောင်စီနယ်မြေ၊ တပ်ကုန်းမြို့နယ်၊  မကျည်းပင်ကျေးရွာအုပ်စု၊ ညောင်ပင်သာကျေးရွာဖြစ်ကာ ရေဘေးကြောင့် ထိခိုက်ခဲ့ရသည်များကို ပြန်လည်ပြင်ဆင်ပေးထားပြီး နေပြည်တော် ဟိုတယ်ဇုန်မှ (၁)နာရီခန့် ကားမောင်းသွားနိုင်မည့် အကွာအဝေးတွင်ရှိကြောင်း ၎င်းက ပြောသည်။ ခရီးသွားလုပ်ငန်းအဖွဲ့ချုပ်က တပ်ကုန်းအနီးရှိ ရွာ (၁)ရွာကို နေ့တစ်ဝက်ခရီးစဥ် သို့မဟုတ် တစ်နေကုန်ခရီးစဉ်အဖြစ်  အလည်အပတ်သွားနိုင်အောင် ဖော်ဆောင်နေခြင်းဖြစ်သည်။ ရေဘေးဖြစ်စဥ်တွင် အဆိုပါရွာရှိ အိမ်များ အကုန်ပါသွားသည့်အတွက် ပြန်လည်တည်ဆောက်ပေးသည့်အခါ အဖွဲ့ချုပ်မှ မတည်ပေးပြီး အိမ်များ ပြန်လည်တည်ဆောက်ကာ Village Plan ဆွဲပေးခဲ့ခြင်းဖြစ်သည်။

မေလအတွင်း တည်ဆောက်မှုများ ပြီးစီးပြီဖြစ်သည့်အတွက် ပိုင်ရှင်များအား ပြန်လွှဲပေးလိုက်ပြီး ဧည့်သည်များ လာရောက်လည်ပတ်နိုင်ရန် ကျေးလက်အခြေပြုခရီးသွားလုပ်ငန်းဖော်ဆောင်နေခြင်းဖြစ်သည်။ လက်ရှိတွင် ခရီးသွားလုပ် ငန်းအကောင်အထည်ဖော်ရန် လုပ်ငန်းစဉ်များကို ဆောင်ရွက်နေဆဲဖြစ်ကာ ကျေးလက်အစားအသောက်များ စားသောက်ကာ အပန်းဖြေခြင်းအပြင် ရွာနံဘေးတွင် သာယာလှပသော ချောင်းငယ်နှင့် ယာခင်းလည်းရှိရာ ဒေသခံများ၏ လုပ်ငန်းခွင်သို့ ကိုယ်တိုင် ဝင်ရောက်လုပ်ကိုင်ခြင်းမျိုး ဆောင်ရွက်ရန် စီစဉ်သွားမည်ဖြစ်ကြောင်း ပြောကြားခဲ့သည်။ 

နေပြည်တော်တွင် နိုင်ငံတကာမှ ဧည့်သည်များ လာရောက်သည့်အခါ မြန်မာ့ကျေးလက်အငွေ့အသက်ကို ရနိုင်စေရန် တစ်ညအိပ်ခရီးစဥ်ဖြစ်စေ၊ နေ့ချင်းပြန်ခရီးစဥ်ဖြစ်စေ လေ့လာနိုင်ရန် စီစဉ်နေသည်ဟု ဦးနောင်းနောင်းဟန်က ပြောကြားခဲ့သည်။ 

ကျေးလက်ဒေသ အစားအသောက်ဖြင့် ဧည့်ခံခြင်း၊ အနားယူပြီး ရိုးရာအနှိပ်ဖြင့်နှိပ်နယ်ခြင်းများ  စီစဥ်ပေးသွားမည်ဖြစ်သည်။ ယခုလုပ်ငန်းများ အဆင်ပြေလာပါက လာမည့်ခရီးသွားရာသီတွင် စတင်လည်ပတ်နိုင်မည်ဖြစ်ပြီး        နည်းနည်းချင်း   မော်ဒယ်ပုံစံဆောင်ရွက်ကာ   တခြားရွာများလည်း ပုံစံတူ လိုက်ကူးနိုင်မည်ဖြစ်သည်ဟုသိရသည်။

စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ်ကင်းရှင်းသော စားသုံးဆီများကို သင့်တင့်သောဈေးနှုန်းဖြင့် ဝယ်ယူစားသုံးနိုင်စေရန်နှင့် ပြည်တွင်းလိုအပ်ချက်များကို ဖြည့်ဆည်းပေးနိုင်ရန် စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန စားသုံးဆီတင်သွင်း သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက ဆောင်ရွက်ပေးလျက်ရှိသည်။

ပြည်တွင်းလိုအပ်ချက်ကို ဖြည့်ဆည်းပေးနိုင်ရေးစားအုန်းဆီကို ပြည်ပမှ ဝယ်ယူတင်သွင်းရာတွင်   စားအုန်းဆီတင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးကို ထိန်းကျောင်းဆောင်ရွက်လျက်ရှိသည်။

ပြည်ပမှ စားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၅ ခုနှစ် ဇွန် ၉ ရက်မှ ၁၅ ရက်အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းသည် စားအုန်းဆီတစ်ပိဿာလျှင် ငွေကျပ် ၆၁၈၅ ကျပ်ဖြစ်ကြောင်း စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန်ကြေညာထားသည်။

ပြည်တွင်းဈေးကွက်အတွင်း အဆိုပါထုတ်ပြန်ကြေညာထားသည့် စျေးနှုန်းထက် ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်သည်။

စားအုန်းဆီအခြေခံလက်ကားရည်ညွှန်းဈေးနှုန်းကို အပတ်စဉ် တနင်္လာနေ့တိုင်း ထုတ်ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက်ကြည့်ရှုလေ့လာနိုင်ကြောင်း သိရှိရသည်။