အစ္စရေးနိုင်ငံဆိုင်ရာ မြန်မာသံရုံးယာယီတာဝန်ခံ/ သံအမတ်ကြီး ဦးကျော်ကျော်မင်းသည် ၁၇-၃-၂၀၂၅ ရက်နေ့ Keren Kayemeth Lelsrael - ဂျူးအမျိုးသားရန်ပုံငွေ (KKL-JNF)၊ အစ္စရေး နိုင်ငံခြားရေးဝန်ကြီးဌာနနှင့် အစ္စရေး သံအမတ်ကြီးများအသင်း (The Ambassadors' Club of Israel) တို့ ပူးပေါင်းစီစဉ်သော ဂါဇာကမ်းမြှောင်ဒေသအနီးရှိ နယ်နိမိတ်များကို သဘာဝပတ်ဝန်းကျင် စူးစမ်းလေ့လာရန် အထူးပြုခရီးစဉ်သို့ အစ္စရေးအခြေစိုက် သံအမတ်ကြီးများ၊ သံရုံး အကြီးအကဲများနှင့် အတူသွားရောက်ခဲ့သည်။  
ခရီးစဉ်အတွင်း အစ္စရေးနိုင်ငံ Negev သဲကန္တာရဒေသ၌ စိုက်ခင်းများ လုပ်ဆောင်ထားမှု၊ စီးပွားရေးအခွင့်အလမ်းများရရှိရေး ထုတ်ကုန်များ ဖန်တီးထုတ်လုပ်မှု၊ ထိရောက်စွာ လုပ်ကိုင် နေသည့် စီမံကိန်းများကို လိုက်လံကြည့်ရှုခဲ့ရပြီး၊ အစ္စရေး- ဟားမတ်စ်စစ်ပွဲ ၁၈ လတာ ကာလအတွင်း ဘေးဒုက္ခခံစားခဲ့ရသည့် Kibbutz Kfar Aza ဒေသခံများအတွက် ရပ်ရွာ ပြန်လည်ထူထောင်ရေး စီမံကိန်းများ ဆောင်ရွက်ထားမှု၊ ၂၀၂၃ ခုနှစ် အောက်တိုဘာလ ၇ ရက်မှ စတင်၍ ၎င်းတို့၏ စိတ်လှုပ်ရှားဖွယ်ခရီးများနှင့် ခံနိုင်ရည်အား မျှဝေပေးသည့်အနေဖြင့် ဂါဇာ ကမ်းမြှောင်အနီး အစ္စရေးဒေသခံများ ထိတွေ့ဆက်ဆံခဲ့ပြီး ခံစားခဲ့ရမှုများ ရင်ဖွင့်ပြောကြားမှုများကို မျှဝေခံစား နားထောင်ခဲ့ကြသည်။ ထို့နောက် KKL-JNF၊ အစ္စရေး၏ သစ်တော ဝန်ဆောင်မှုများနှင့် Gilat အပင်ပျိုးခင်းများသို့ သွားရောက်ကြည့်ရှု့ခဲ့ကြောင်း။ ထို့နောက် Nova ဂီတပွဲတော်လုပ်ခဲ့သည့် နေရာသို့ သွားရောက်လေ့လာခဲ့ပြီး Iron Swords Forest ၌ သံတမန်အကြီးအကဲများ အမှတ်တရ သစ်ပင်စိုက်ပျိုးခြင်း အခမ်းအနားတွင် မြန်မာနိုင်ငံ ကိုယ်စားပြု သစ်ပင်စိုက်ပျိုးပေးခဲ့ကြောင်းသိရသည်။ 
ခရီးစဉ်နောက်ဆုံး အနေဖြင့် ဂါဇာကမ်းမြှောင် မြောက်ပိုင်းနှင့် အနီးစပ်ဆုံး ရှိနေသည့် Kibbutz Zikim စုပေါင်းရွာသို့ သွားရောက်ကာ စုပေါင်းစနစ်ဖြင့် လုပ်ကိုင်ဆောင်ရွက်မှု အခြေအနေ ရှင်းလင်းတင်ပြမှုကို နားထောင်ခဲ့ရပြီး၊ ရေဆိုးစနစ်မှ ပြန်လည်သန့်စင်မှု၊ စွမ်းအင်ရယူမှုများ၊ လုံခြုံရေး ဆောင်ရွက်ထားရှိမှု အခြေအနေများကုလေ့လာခဲ့ကြရပြီး ခရီးစဉ် အောင်မြင်စွာ ပြီးဆုံးခဲ့ကြောင်း သိရသည်။
 

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ဒုတိယဝန်ကြီး ဦးဌေးလှိုင်သည် ဖိလစ်ပိုင်နိုင်ငံ နိုင်ငံခြားရေးဝန်ကြီးဌာန ဒုတိယဝန်ကြီး H.E. Eduardo Jose A. De Vega နှင့်အဖွဲ့ကို မတ်လ ၁၇ရက်နေ့၊ မွန်းလွဲ ၂ နာရီတွင် နေပြည်တော်ရှိ အဆိုပါဝန်ကြီးဌာန အစည်းအဝေးခန်းမ၌ လက်ခံတွေ့ဆုံခဲ့ကြောင်း သိရသည်။
ထိုသို့တွေ့ဆုံစဉ် မြန်မာနိုင်ငံ၏ နယ်စပ်ဒေသများတွင် ဖြစ်ပေါ်လျက်ရှိသည့် အွန်လိုင်းလောင်းကစားမှုနှင့် ငွေကြေးလိမ်လည်မှုလုပ်ငန်းများ  ကို အိမ်နီးချင်းနိုင်ငံများအပါအဝင် နိုင်ငံတကာအဖွဲ့အစည်းများနှင့် ပူးပေါင်းကာ စုံစမ်းဖော်ထုတ်၍ ထိထိရောက်ရောက် တားဆီးကာကွယ် တိုက်ဖျက်ဆောင်ရွက်နေမှု၊ ယင်းသို့ဆောင်ရွက်ရာတွင် လူကုန်ကူးခံရသည့် နိုင်ငံခြားသားများ ကူညီကယ်တင်ဆောင်ရွက်မှုနှင့် ယင်းတို့အနက် ဖိလစ်ပိုင်နိုင်ငံသားများအား ကူညီကယ်တင် ဆောင်ရွက်ထားရှိမှုအခြေအနေ၊ ကူညီကယ်တင်ထားသည့် နိုင်ငံခြားသားများကို သက်ဆိုင်ရာ နိုင်ငံများသို့ ပြန်လည်ပို့ဆောင်နိုင်ရေး လုပ်ငန်းစဉ်အလိုက် စီစဉ်ဆောင်ရွက်နေမှု အခြေအနေ၊ ပြည်ဝင်ဗီဇာအမျိုးမျိုးဖြင့် မြန်မာနိုင်ငံသို့ ဝင်ရောက်/ထွက်ခွာလျက်ရှိသည့် ဖိလစ်ပိုင်နိုင်ငံသားများနှင့် မြန်မာ - ဖိလစ်ပိုင်နှစ်နိုင်ငံအကြား လူဝင်မှုကြီးကြပ်ရေးဆိုင်ရာများ ဆက်လက်ပူးပေါင်းဆောင်ရွက်နိုင်ရေး အခြေအနေများနှင့်စပ်လျဉ်း၍ အမြင်ချင်းဖလှယ်ဆွေးနွေးခဲ့ကြကြောင်း သိရသည်။

တရုတ်နိုင်ငံဆိုင်ရာ မြန်မာသံအမတ်ကြီး ဦးတင်မောင်ဆွေသည် ၂၀၂၅ ခုနှစ်၊ မတ်လ ၁၄ ရက်တွင် စင်ကာပူနိုင်ငံသံရုံးမှကြီးမှူး၍ ပေကျင်းမြို့၌ ကျင်းပသည့် ပေကျင်းမြို့ အာဆီယံကော်မတီ (ASEAN Committee in Beijing – ACB) သံရုံး အကြီးအကဲများ အစည်းအဝေးသို့ အခြားအာဆီယံသံအမတ်ကြီးများနှင့်အတူ ပါဝင်တက်ရောက်ခဲ့ကြောင်း သိရသည်။
အစည်းအဝေးတွင် တက်ရောက်လာသော အာဆီယံသံအမတ်ကြီးများနှင့် ကိုယ်စားလှယ်များက  ဖိလစ်ပိုင်သံရုံးမှ ကြီးမှူး၍ ၂၀-၁၁-၂၀၂၄ ရက်တွင် ကျင်းပခဲ့သော ပေကျင်းမြို့၊ အာဆီယံကော်မတီ (ACB) ၏ အစည်းအဝေးမှတ်တမ်း (Summary Record) အား အတည်ပြုခဲ့ပြီး အာဆီယံ- တရုတ် ဆွေးနွေးဖက်ဆက်ဆံရေး၏ ဖြစ်ပေါ်တိုးတက်မှု အခြေအနေများ၊ သက်ဆိုင်ရာ အာဆီယံနိုင်ငံများနှင့် တရုတ်နိုင်ငံတို့အကြား ဆက်ဆံရေးတိုးမြှင့်ဆောင်ရွက်နေမှု အခြေအနေများနှင့် ဒေသတွင်းဖြစ်ပေါ်တိုးတက်မှု အခြေအနေများအား ဆွေးနွေး၍ အမြင်ချင်းဖလှယ်ခဲ့သည်။ မြန်မာသံအမတ်ကြီးက ၂၀၂၄ ခုနှစ် ဒီဇင်ဘာလမှစ၍ ၄ လတာအတွင်း မြန်မာ-တရုတ် နှစ်နိုင်ငံဆက်ဆံရေးနှင့် နှစ်နိုင်ငံကုန်သွယ်မှုဆိုင်ရာဖြစ်ပေါ် တိုးတက်မှုများကို ဆွေးနွေးပြောကြားခဲ့ပြီးနောက် အာဆီယံနိုင်ငံများနှင့် တရုတ်နိုင်ငံတို့သည် ကုန်သွယ်မှုနယ်ပယ်၌ ဆက်လက်ပူးပေါင်းဆောင်ရွက်သွားမည်ဖြစ်ပြီး နိုင်ငံများအကြား စီးပွားရေးဖွံ့ဖြိုးတိုးတက်မှုနှင့် ချစ်ကြည်ရင်းနှီးမှုကို မြှင့်တင်နိုင်ရေးကြိုးပမ်းမှုမှတစ်ဆင့် တည်ငြိမ်အေးချမ်းပြီး သာယာဝပြောသောဒေသကို ဖန်တီးနိုင်ရန်မျှော်လင့်ကြောင်း ဆွေးနွေးပြောကြားခဲ့သည်။
ထို့နောက် သံအမတ်ကြီးသည် စင်ကာပူနိုင်ငံ သံအမတ်ကြီး H.E. Peter Tan က ဧည့်ခံကျွေးမွေးသည့် အလုပ်သဘော ညစာစားပွဲအခမ်းအနားသို့ ပါဝင်တက်ရောက်ခဲ့သည်။ အဆိုပါ အခမ်းအနားသို့ တရုတ်ကွန်မြူနစ်ပါတီ ဗဟိုကော်မတီ နိုင်ငံတကာရေးရာဌာန ဝန်ကြီး Mr. Liu Jianchao နှင့် ဒုတိယဝန်ကြီး Ms. Sun Haiyan တို့လည်း တက်ရောက်၍ အာဆီယံသံအမတ်ကြီးများနှင့် နှစ်နိုင်ငံအကြား ရှိရင်းစွဲပူးပေါင်းဆောင်ရွက်မှုများနှင့် စပ်လျဉ်း၍ ရင်းနှီးစွာပွင့်လင်းစွာ ဆွေးနွေးခဲ့ကြောင်းသိရသည်။

နီပေါနိုင်ငံဆိုင်ရာ မြန်မာသံအမတ်ကြီး ဦးမျိုးမြင့်မောင်သည် နီပေါနိုင်ငံ လုမ္ဗိနီဥယျာဉ်တွင် ၂၀၂၅ ခုနှစ်၊ မတ်လ ၄ ရက်နေ့မှ ၉ ရက်နေ့အထိ ကျင်းပပြုလုပ်လျက်ရှိသည့် 4th Lumbini International Tipitaka Chanting Ceremony 2025 ဖွင့်ပွဲအခမ်းအနားသို့ မြန်မာနိုင်ငံကိုယ်စားပြု တက်ရောက်ခဲ့ကြောင်းသိရသည်။ 
ဖွင့်ပွဲအခမ်းအနားသို့ အခမ်းအနားကို ဦးစီးပြုလုပ်သည့် All Nepal Bhikkhu Association ၊ ဗုဒ္ဓဘာသာကိုးကွယ်သည့် နိုင်ငံများမှ ဆရာတော်ကြီးများနှင့် သီလရှင်ဆရာကြီးများ၊ Lumbini Development Trust (LDT) ၊ Lumbini Buddhist University အပါအဝင် ဘာသာရေးဆိုင်ရာ အဖွဲ့အစည်းများ၊ နီပေါနိုင်ငံအခြေစိုက် ဗုဒ္ဓဘာသာ ကိုးကွယ်သည့်နိုင်ငံများမှ သံအမတ်ကြီးများနှင့် သံရုံးယာယီတာဝန်ခံများ၊ ဘုရားဖူးလာပြည်သူများ၊ အင်အား (၂,၀၀၀) ကျော်ခန့် တက်ရောက်ခဲ့ကြပြီး အဓိက ဧည့်သည်တော်အဖြစ် နီပေါနိုင်ငံ ဒုတိယဝန်ကြီးချုပ်နှင့် မြို့ပြဆိုင်ရာဖွံ့ဖြိုးတိုးတက်မှုဝန်ကြီးဌာန ဝန်ကြီး Mr. Prakash Man Singh တက်ရောက်ခဲ့သည်။
အခမ်းအနားအစီအစဉ်အရ ဗုဒ္ဓမြတ်စွာဘုရားအား အခမ်းအနားကျင်းပမည့် လုမ္ဗိနီဥယျာဉ် မယ်တော်မာယာအုတ်ကျောင်းသို့ ပင့်ဆောင်ပူဇော်ခြင်း၊ ပိဋိကတ်ကျမ်းစာအုပ်များအား ပင့်ဆောင်ခြင်း၊ ပင့်ဆောင်ပူဇော်ရာလမ်းတစ်လျှောက် ရဟန်းရှင်လူပြည်သူများက ဗုဒ္ဓဂုဏ်တော်များ ရွတ်ဖတ်ပူဇော်ခြင်းတို့ ပြုလုပ်ကြပါသည်။ အခမ်းအနားတွင် နိုင်ငံအလိုက် သံဃာ့ဥသျှောင်ဆရာကြီးများ၊ နီပေါနိုင်ငံ ဒုတိယဝန်ကြီးချုပ်၊ မြန်မာ၊ ထိုင်း၊ သီရိလင်္ကာနိုင်ငံတို့မှ သံအမတ်ကြီးများနှင့် သံရုံးယာယီတာဝန်ခံ၊ အခမ်းအနား၏ အဓိကအလှူရှင်နှင့် အဖွဲ့အစည်းမှ တာဝန်ရှိသူများက ချီးကျူးဂုဏ်ပြုပူဇော်သည့် အမှတ်တရစကားများ အသီးသီးပြောကြားခဲ့သည်။

 မြန်မာသံအမတ်ကြီးက ချီးကျူးဂုဏ်ပြုပူဇော်စကားပြောကြားရာတွင် အခမ်းအနားသို့ မြန်မာ နိုင်ငံကိုယ်စားပြု တက်ရောက်ခွင့်ရရှိခဲ့သည့်အတွက် ဂုဏ်ယူဝမ်းမြောက်ပါကြောင်း၊ အခမ်းအနားကို တာဝန်ယူဦးစီးကျင်းပပေးသည့် All Nepal Bhikkhu Association ၊ ပူးပေါင်းဆောင်ရွက်ခဲ့ကြသည့် LDT နှင့် နီပေါနိုင်ငံ အစိုးရ၏ သက်ဆိုင်ရာဝန်ကြီးဌာနများနှင့် တာဝန်ရှိသူများ၊ Lumbini Buddhist University ၊ Lumbini Provincial Government တို့မှ တာဝန်ရှိသူများအားလုံးကို အထူးပင်ကျေးဇူးတင်ရှိပါကြောင်း၊ မြတ်စွာဘုရားရှင် ဟောကြားမိန့်မှာချက်များကို မှတ်တမ်းတင်ပြီး ပူဇော်စောင့်ရှောက်ခြင်း၊ လိုက်နာကျင့်သုံးခြင်း၊ ပွားများအောင် အားထုတ်ကြိုးပမ်းခြင်း စသည်တို့သည် ဗုဒ္ဓသာသနာတော်ကို အရှည်တည်တံ့ ထွန်းလင်းတောက်ပစေရန် မွန်မြတ်သော လုပ်ဆောင်ခြင်းများပင်ဖြစ်ပါကြောင်း၊ မြန်မာနိုင်ငံတွင်လည်း ရဟန်းသံဃာတော်များအား တိပိဋိကတ်ဘွဲ့တံဆိပ်တော်များ ဆက်ကပ်လှူဒါန်းခြင်း၊ ထိုသို့ ဆက်ကပ်လှူဒါန်းခြင်းအပြင် ဗုဒ္ဓအဆုံးအမများနှင့်အညီ မြန်မာ ဘုန်းတော်ကြီးကျောင်းများနှင့် မြန်မာလူမှုဝန်းကျင်အဖွဲ့အစည်းများ၏ နေ့စဉ်ဘဝလှုပ်ရှားမှုများတွင် လိုက်နာကျင့်ကြံမှုများ လုပ်ဆောင်လျက်ရှိပါကြောင်း၊ ဗုဒ္ဓသာသနာရောင်ဝါနေသို့ ထာဝရထွန်းလင်းပါစေကြောင်း စသည်ဖြင့် ပြောကြားခဲ့သည်။ 
သံအမတ်ကြီးသည် ခရီးစဉ်အတွင်း လုမ္ဗိနီရှိ LDT ၏ ရုံးခန်းတွင် Vice Chairman ဖြစ်သူ ဘုန်းတော်ကြီး Venerable Khenpo Chime နှင့်လည်းကောင်း၊ Lumbini Provincial Government ရုံးစိုက်ရာ Dang မြို့သို့ သွားရောက်ခဲ့ပြီး Lumbini Provincial Government အကြီးအကဲဖြစ်သူ Chief Minister Mr. Chet Narayan Acharya ထံသို့လည်းကောင်း သီးခြားစီ သွားရောက်တွေ့ဆုံဂါရဝပြုခဲ့ပြီး မြန်မာနှင့် နီပေါ နှစ်နိုင်ငံအကြား ချစ်ကြည်ရင်းနှီးမှုနှင့် အပြန်အလှန်ပူးပေါင်းဆောင်ရွက်မှုများ၊ လုမ္ဗိနီရှိ မြန်မာရွှေကျောင်းတော်ကြီး၏ သာသနာပြု လုပ်ငန်းလုပ်ဆောင်နေမှုများကို ရှင်းလင်းဆွေးနွေးခဲ့ပြီး သက်ဆိုင်ရာအဖွဲ့အစည်းများအလိုက် လိုအပ်သည်များ ပူးပေါင်းကူညီဆောင်ရွက်ပေးရန် မေတ္တာရပ်ခံပန်ကြားခဲ့ကြောင်း သိရသည်။ 

ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသ၊ နန်နင်းမြို့၌ ၇-၃-၂၀၂၅ ရက်နေ့တွင် ကွမ်ရှီးဒေသနိုင်ငံခြားရေးရုံးမှ ကြီးမှူးပြုလုပ်သော “Radiance & Fragrance-A Brighter Future for Women” အစီအစဉ်သို့ နန်နင်းမြို့၊ မြန်မာကောင်စစ်ဝန်ချုပ်ရုံးမှ ကောင်စစ်ဝန်ချုပ် ဒေါ်ခိုင်ဆုလင်းနှင့် အမျိုးသမီးဝန်ထမ်းများ ပါဝင်တက်ရောက်ခဲ့ကြောင်းသိရသည်။ 
အဆိုပါအစီအစဉ်ကို ကမ္ဘာ့အမျိုးသမီးများနေ့အထိမ်းအမှတ်အဖြစ် ကျင်းပခြင်းဖြစ်ကာ ကွမ်ရှီးဒေသရှိ အစိုးရဌာန၊ အဖွဲ့အစည်း၊ ကျောင်းများမှ အမျိုးသမီးဝန်ထမ်းများ၊ ဆရာမများ၊ နန်နင်းမြို့အခြေစိုက် အာဆီယံကောင်စစ်ဝန်ချုပ်ရုံးများမှ အမျိုးသမီးကောင်စစ်ဝန်ချုပ်များ၊ ကောင်စစ်ဝန်ချုပ်များ၏ ဇနီးများ၊ အမျိုးသမီးဝန်ထမ်းများစသည်ဖြင့် (၅၀)ဦးခန့် ပါဝင်တက်ရောက်ခဲ့သည်။ အဆိုပါပွဲတွင် ကွမ်ရှီးဒေသနိုင်ငံခြားရေးရုံးမှ ဒုတိယညွှန်ကြားရေးမှူးချုပ် Ms. Sun Chunhua က အဖွင့်နှုတ်ဆက်စကားပြောကြားခဲ့ကာ ပါဝင်တက်ရောက်သူများက စကားဝိုင်းဆွေးနွေးပွဲ၊ ကျွမ့်ရိုးရာလက်မှုပညာသင်တန်းနှင့် ပန်းအလှဆင်သင်တန်း အစီအစဉ်များတွင် တက်ကြွစွာပါဝင်ခဲ့ကာ မြန်မာကောင်စစ်ဝန်ချုပ်ရုံးမှ မြန်မာ့ရိုးရာအစားအစာဖြစ်သည့် မုန့်ဟင်းခါးဖြင့် ပါဝင်တည်းခင်းဧည့်ခံခဲ့ကြောင်း သိရသည်။ 

ကမ္ဘောဒီးယားနိုင်ငံဆိုင်ရာ မြန်မာသံအမတ်ကြီးဦးကျော်စိုးမင်းသည် ၂၀၂၅ ခုနှစ်၊ မတ်လ ၆ ရက်တွင် ကမ္ဘောဒီးယားနိုင်ငံ၊ ဖနောင်ပင်မြို့၌ ကျင်းပပြုလုပ်သည့် “ကမ္ဘောဒီးယား-အာဆီယံ စီးပွားရေးဆွေးနွေးပွဲ ၂၀၂၅” ဖွင့်ပွဲအခမ်းအနားသို့ ပါဝင်တက်ရောက်ခဲ့ကြောင်းသိရသည်။ 

အဆိုပါဖွင့်ပွဲအခမ်းအနားတွင် ကမ္ဘောဒီးယားနိုင်ငံဝန်ကြီးချုပ် ဆမ်ဒတ်ဟွန်မာနိုက်က အဖွင့်အမှာစကားပြောကြားခဲ့ပြီး သက်ဆိုင်ရာဝန်ကြီးဌာနများမှ အဆင့်မြင့်အရာရှိကြီးများ၊ စီးပွားရေးလုပ်ငန်းရှင်များ၊ ဖနောင်ပင်မြို့အခြေစိုက် ပြည်ပသံရုံး၊ အဖွဲ့ရုံးများမှ သံအမတ်ကြီးများနှင့် သံတမန်များ ပါဝင်တက်ရောက်ခဲ့သည်။

ကမ္ဘောဒီးယား-အာဆီယံ စီးပွားရေးဆွေးနွေးပွဲကို ၂၀၂၅ ခုနှစ်၊ မတ်လ ၅ ရက်မှ ၆ ရက် အထိ ကမ္ဘောဒီးယားနိုင်ငံ၊ ဖနောင်ပင်မြို့၌ကျင်းပရာ နိုင်ငံပေါင်း (၂၇)နိုင်ငံမှ စီးပွားရေးလုပ်ငန်းရှင် (၇၀၀)ဦးခန့် တက်ရောက်ပြီး မြန်မာနိုင်ငံမှ စီးပွားရေးလုပ်ငန်းရှင်များလည်း ပါဝင်တက်ရောက်ခဲ့ကြောင်း သိရသည်။ 

နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒုတိယဝန်ကြီးချုပ်နှင့် နိုင်ငံတော်ဝန်ကြီးချုပ်ရုံး ပြည်ထောင်စုဝန်ကြီး ဗိုလ်ချုပ်ကြီး တင်အောင်စန်းသည် မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E. Mr. Abhay Thakur အား မတ်လ (၅) ရက်နေ့၊ မွန်းလွဲပိုင်းတွင် နိုင်ငံတော်စီမံအုပ်ချုပ်ရေးကောင်စီရုံး ဧည့်ခန်းမ၌ လက်ခံတွေ့ဆုံခဲ့သည်။
တွေ့ဆုံစဉ် မြန်မာ-အိန္ဒိယနှစ်နိုင်ငံအကြား ဆောင်ရွက်နေသည့် စီမံကိန်းဆိုင်ရာကိစ္စရပ်များ၊ လမ်းပန်းဆက်သွယ်ရေးနှင့် ကုန်သွယ်ရေးဆိုင်ရာကိစ္စရပ်များ၊ လျှပ်စစ်နှင့်စွမ်းအင်ကဏ္ဍဆိုင်ရာ ကိစ္စရပ်များနှင့် နှစ်နိုင်ငံပူးပေါင်းဆောင်ရွက်မှုမြှင့်တင်ရေးဆိုင်ရာကိစ္စရပ်တို့အား ရင်းနှီးပွင့်လင်းစွာ အမြင်ချင်းဖလှယ် ဆွေးနွေးခဲ့ကြသည်။ တွေ့ဆုံပွဲသို့ နိုင်ငံတော်ဝန်ကြီးချုပ်ရုံးမှ တာဝန်ရှိသူများ တက်ရောက်ခဲ့ကြကြောင်း သိရှိရသည်။  

အာဆီယံဆိုင်ရာ မြန်မာအမြဲတမ်းကိုယ်စားလှယ် ဦးအောင်မျိုးမြင့်သည် အာဆီယံ အတွင်းရေးမှူးချုပ်ရုံး၌ ၃-၃-၂၀၂၅ ရက်နှင့် ၅-၃-၂၀၂၅ ရက်တို့တွင် အသီးသီးကျင်းပပြုလုပ်ခဲ့သည့် သက်ရှည်ကျန်းမာစွာနေထိုင်မှုနှင့် ဆန်းသစ်တီထွင်မှုဆိုင်ရာ အာဆီယံစင်တာနှင့် ဆွေးနွေးဖလှယ်ပွဲနှင့် (၇၅)ကြိမ်မြောက် အာဆီယံပေါင်းစည်းရေးဦးဆောင်ဦးရွက်ပြုမှု အစီအစဉ်လုပ်ငန်းအဖွဲ့အစည်းအဝေးတို့သို့  ပါဝင်တက်ရောက်ခဲ့ကြောင်းသိရသည်။ 
အာဆီယံဆိုင်ရာ ထိုင်းအမြဲတမ်းကိုယ်စားလှယ်အဖွဲ့ရုံးက ကြီးမှူးကျင်းပသည့် သက်ရှည်ကျန်းမာစွာနေထိုင်မှုနှင့် ဆန်းသစ်တီထွင်မှုဆိုင်ရာ အာဆီယံစင်တာနှင့် ဆွေးနွေးဖလှယ်ပွဲတွင် တက်ရောက်လာသူများက အာဆီယံအနေဖြင့် ၂၀၁၅ ခုနှစ်၌ ထုတ်ပြန်ခဲ့သည့် သက်ရှည်ကျန်းမာစွာနေထိုင်ရေး သက်ကြီးရွယ်အိုများ၏စွမ်းပကားကိုမြှင့်တင်ပေး ကွာလာလမ်ပူထုတ်ပြန်ချက်နှင့်အညီ ဒေသတွင်းကတိကဝတ်များကို ထပ်လောင်းကတိပြုရေးအပါအဝင် သက်ကြီးရွယ်အိုများအား စောင့်ရှောက်ရေးအရေးပါမှုကို  အသိပညာပေးရေး၊ ဒေသတွင်း၌ သက်ရှည်ကျန်းမာနေထိုင်မှုကို ပံ့ပိုးမည့်စွမ်းရည်ဖွံ့ဖြိုးတိုးတက်ရေး၊ သုတေသနနှင့် ဆန်းသစ်တီထွင်မှုဆိုင်ရာအစီအစဉ်များကို အကောင်အထည်ဖော်ရေး၊ သက်ရှည်ကျန်းမာနေထိုင်မှုနှင့် ဆန်းသစ်တီထွင်မှုဆိုင်ရာအာဆီယံစင်တာ (ACAI) နှင့် အာဆီယံနိုင်ငံများ၊ ဆွေးနွေးဖက်နှင့် ဖွံ့ဖြိုးမှုမိတ်ဖက်နိုင်ငံများနှင့် အခြားသက်ဆိုင်ရာအဖွဲ့အစည်းများအကြား ပူးပေါင်းဆောင်ရွက်မှု အလားအလာကောင်းများကို ရှာဖွေဖော်ထုတ်ရေး၊ ACAI ၏မျှော်မှန်းချက်များ ပြည့်မီရေးအတွက် ဦးစားပေးအစီအမံများနှင့် ဦးဆောင်ဦးရွက်ပြုမှုများမှတစ်ဆင့် ကဏ္ဍစုံပူးပေါင်းဆောင်ရွက်မှုမြှင့်တင်ရေး ကိစ္စရပ်များအပေါ် ရင်းနှီးပွင့်လင်းစွာ အမြင်ချင်းဖလှယ် ဆွေးနွေးခဲ့ကြသည်။  
(၇၅) ကြိမ်မြောက် အာဆီယံပေါင်းစည်းရေးဦးဆောင်ဦးရွက်ပြုမှုအစီအစဉ် လုပ်ငန်းအဖွဲ့အစည်းအဝေးတွင် အာဆီယံနိုင်ငံများအကြား ဖွံ့ဖြိုးမှုကွာဟချက်ကျဉ်းမြောင်းစေရေးနှင့် အာဆီယံပေါင်းစည်းမှုခိုင်မာစေရေး၊ အာဆီယံနိုင်ငံများအကြား စီးပွားရေးဖွံ့ဖြိုးမှု မျှတစေရေးအတွက် IAI Work Plan IV (2021-2025) ဖြင့်အကောင်အထည်ဖော်ဆောင်ရွက်နေမှု၊ ၂၀၂၅ ခုနှစ်အတွင်း ဆောင်ရွက်သွားမည့်လုပ်ငန်းစဉ်များ၊ IAI Work Plan V အသစ်ရေးဆွဲရေးတို့နှင့် စပ်လျဉ်း၍ ဆွေးနွေးခဲ့ကြပြီး အာဆီယံပေါင်းစည်းရေးလုပ်ငန်းအဖွဲ့ဝင် အမြဲတမ်းကိုယ်စားလှယ်များနှင့် အာဆီယံအတွင်းရေးမှူးချုပ်ရုံးရှိ IAI and NDG Division မှ တာဝန်ရှိသူများ တက်ရောက်ခဲ့ကြကြောင်းသိရသည်။

နိုင်ငံခြားရေးဝန်ကြီးဌာန ဒုတိယဝန်ကြီး ဦးကိုကိုကျော်သည် ဗန်ကောက်မြို့အခြေစိုက် ကုလသမဂ္ဂအမျိုးသမီးအဖွဲ့ (UN Women) ရုံး၏ အာရှနှင့်ပစိဖိတ်ဒေသဆိုင်ရာ ညွှန်ကြားရေးမှူး Ms. Christine Arab အား ၂၀၂၅ ခုနှစ်၊ မတ်လ ၃ ရက်တွင် နေပြည်တော်ရှိ နိုင်ငံခြားရေးဝန်ကြီးဌာန၌ လက်ခံတွေ့ဆုံခဲ့ကြောင်းသိရသည်။ 

ထိုသို့တွေ့ဆုံစဉ် မြန်မာနိုင်ငံ၌ UN Women က ဆောင်ရွက်မည့် လုပ်ငန်းများအပေါ် အမြင်ချင်းဖလှယ်ခဲ့ပြီး၊ မြန်မာနိုင်ငံနှင့် UN Women တို့အကြား ပူးပေါင်းဆောင်ရွက်မှု ပိုမိုမြှင့်တင်ရေးနှင့်စပ်လျဉ်း၍ ရင်းနှီးပွင့်လင်းစွာ ဆွေးနွေးခဲ့သည်။

အစည်းအဝေးသို့ နိုင်ငံခြားရေးဝန်ကြီးဌာနမှ အဆင့်မြင့်အရာရှိကြီးများ တက်ရောက်ခဲ့ကြောင်းသိရသည်။

ပြန်ကြားရေးဝန်ကြီးဌာန၊ မီဒီယာဖွံ့ဖြိုးတိုးတက်ရေးဦးစီးဌာနမှဦးစီး၍ အိမ်ရှင်အဖြစ် တာဝန်ယူကျင်းပသည့် “ထိရောက်သော လူထုဆက်ဆံရေးအတွက် အစိုးရပြောရေးဆိုခွင့်ရှိသူများ စွမ်းဆောင်ရည်မြှင့်တင်ခြင်း” အလုပ်ရုံဆွေးနွေးပွဲကို ဖေဖော်ဝါရီလ (၂၆) ရက်နေ့မှ စတင်ကျင်းပခဲ့ပြီး (၂၈) ရက်နေ့တွင် အောင်မြင်စွာကျင်းပပြီးစီးခဲ့သည်။
အလုပ်ရုံဆွေးနွေးပွဲသို့ အာဆီယံအဖွဲ့ဝင်နိုင်ငံများဖြစ်သည့် ကမ္ဘောဒီးယား၊ ထိုင်း၊ ဖိလစ်ပိုင်၊ မလေးရှား၊ မြန်မာ၊ လာအိုနှင့် အင်ဒိုနီးရှားနိုင်ငံတို့မှ ကိုယ်စားလှယ်များ၊ အာဆီယံအတွင်းရေးမှူးချုပ်ရုံး၊ သင်တန်းနည်းပြများ၊ ဝန်ကြီးဌာနများမှတာဝန်ရှိသူများ၊ မြန်မာနိုင်ငံသတင်းမီဒီယာကောင်စီမှ တာဝန်ရှိသူများနှင့် လေ့လာသူအဖြစ် ဂျပန်နိုင်ငံမှ ကိုယ်စားလှယ်တစ်ဦး တက်ရောက်ခဲ့ကြသည်။
ဆွေးနွေးပွဲတက်ရောက်လာကြသူများသည် အစိုးရပြောရေးဆိုခွင့်ရှိသူများအနေဖြင့် လူထုနှင့်ထိရောက်သော ဆက်ဆံရေးဆောင်ရွက်နိုင်ရန်အတွက် ပြင်ဆင်ထားရှိရမည့် စိတ်နေစိတ်ထား၊ အသံအနေအထားနှင့် ကိုယ်ဟန်အနေအထားဆိုင်ရာ၊ မီဒီယာများနှင့်ချိတ်ဆက်၍ သတင်းစာရှင်းလင်းပွဲကျင်းပမှုဆိုင်ရာ၊ တွေ့ဆုံမေးမြန်းခြင်း ဆောင်ရွက်မှုဆိုင်ရာ၊ မီဒီယာများနှင့် ဆက်သွယ်ချိတ်ဆက်မှုဆိုင်ရာ၊ ဝက်ဘ်ဆိုက်များနှင့် ဆိုရှယ်မီဒီယာ အသုံးပြုခြင်းဆိုင်ရာ အကြောင်းအရာများကို အဖွဲ့လိုက်ဆွေးနွေးခဲ့ကြသည်။ အလုပ်ရုံဆွေးနွေးပွဲကို အာဆီယံဒေသတွင်းရှိ အစိုးရပြောရေးဆိုခွင့်ရှိသူများ၏ စွမ်းဆောင်ရည်မြှင့်တင်ခြင်းဖြင့် မီဒီယာနှင့်အစိုးရတာဝန်ရှိသူများအကြား ထိထိရောက်ရောက်ဆက်သွယ်ပြောဆိုနိုင်ရန်၊ အဓိကကျသည့် သတင်းစကားများ ဖြန့်ဖြူးပေးပို့နိုင်ရန်နှင့် အစိုးရနှင့်ပြည်သူလူထုအကြား ယုံကြည်မှုတက်ဆောက်ရန်သာမက အကျပ်အတည်းအခြေအနေများကို ကိုင်တွယ်ဖြေရှင်းရန်အတွက် လိုအပ်သော ကျွမ်းကျင်မှုနှင့် အသိပညာများဖလှယ်နိုင်ရန် ရည်ရွယ်ပြီး အာဆီယံပြန်ကြားရေးဆပ်ကော်မတီ၏ စီမံကိန်းတစ်ခုအဖြစ် အာဆီယံယဉ်ကျေးမှု ရန်ပုံငွေအထောက်အပံ့ဖြင့် ပြန်ကြားရေးဝန်ကြီးဌာန၊ မီဒီယာဖွံ့ဖြိုးတိုးတက်ရေးဦးစီးဌာနက စီစဉ်ကျင်းပခြင်းဖြစ်သည်။
 အလုပ်ရုံဆွေးနွေးပွဲသို့ တက်ရောက်လာသည့် အာဆီယံအဖွဲ့ဝင်နိုင်ငံများမှ ကိုယ်စားလှယ် များနှင့် သင်တန်းနည်းပြများအား (၂၅-၂-၂၀၂၅) ရက်နေ့ (၁၃:၀၀)နာရီအချိန်တွင် မြန်မာ့ကျောက်မျက်ရတနာပြတိုက်သို့လည်းကောင်း၊ (၂၇-၂-၂၀၂၅)ရက်နေ့ (၁၉:၀၀)နာရီ အချိန်တွင် ပြည်ထောင်စုနယ်မြေ နေပြည်တော်ရှိ မာရဝိဇယဗုဒ္ဓဥယျာဉ်ဝတ္ထုကံတော်တွင် တည်ထားပူဇော်ထားသည့် မာရဝိဇယဗုဒ္ဓရုပ်ပွားတော်မြတ်ကြီးကို သွားရောက်ဖူးမြော်နိုင်ရန် ပို့ဆောင်ပေးခဲ့ကြောင်းနှင့် အလုပ်ရုံဆွေးနွေးပွဲကို (၂၈-၂-၂၀၂၅)ရက်နေ့ (၁၂:၀၀)နာရီတွင် အောင်မြင်စွာ ကျင်းပပြီးစီးခဲ့ကြောင်းသတင်းရရှိသည်။