အာဆီယံယူ-၁၉ အမျိုးသမီးပြိုင်ပွဲတွင်မြန်မာအသင်း အိမ်ရှင်ဗီယက်နမ်နှင့် စတင်ကစားရမည်

ဇွန် ၉ ရက်မှ ၁၈ ရက်အထိ ဗီယက်နမ်နိုင်ငံ၌ ကျင်းပမည့် ၂၀၂၅ အာဆီယံယူ ၁၉ အမျိုးသမီးပြိုင်ပွဲ အုပ်စုပွဲစဉ်များ ထွက်ပေါ်လာပြီဖြစ်ပြီး မြန်မာအသင်းသည် အိမ်ရှင်ဗီယက်နမ်အသင်းနှင့် စတင် ကစားရမည်ဖြစ်သည်။  

ယင်းပြိုင်ပွဲတွင် အသင်းစုစုပေါင်း ရှစ်သင်း ဝင်ရောက်ယှဉ်ပြိုင်မည်ဖြစ်ပြီး အုပ်စု(က)တွင် အိမ်ရှင်ဗီယက်နမ်၊ မြန်မာ၊ လာအို၊ တီမော၊ အုပ်စု(ခ)တွင် ထိုင်း၊ အင်ဒိုနီးရှား၊ ကမ္ဘောဒီးယားနှင့် မလေးရှားအသင်းတို့ ပါဝင်နေသည်။ မြန်မာအသင်းသည် အုပ်စုပွဲများအဖြစ် ဇွန် ၉ ရက်တွင် အိမ်ရှင် ဗီယက်နမ်အသင်း၊ ဇွန် ၁၁ ရက်တွင် လာအိုအသင်း၊ ဇွန် ၁၃ ရက်တွင် တီမောအသင်းနှင့် ယှဉ်ပြိုင် ကစားမည်ဖြစ်သည်။

အုပ်စုပွဲများကို ဇွန် ၉ ရက်၊ ၁၁ ရက်နှင့် ၁၃ ရက်တွင် တစ်နေ့လျှင် လေးပွဲနှုန်း ကျင်းပမည်ဖြစ်ပြီး ဆီမီးဖိုင်နယ် ပွဲစဉ်များကို ဇွန် ၁၆ ရက်၊ ဗိုလ်လုပွဲနှင့် တတိယလုပွဲကို ဇွန် ၁၈ ရက်တွင် ကျင်းပမည် ဖြစ်သည်။

မြန်မာ ယူ-၁၉ အမျိုးသမီးအသင်းသည် ယခုနှစ်အတွင်း နိုင်ငံတကာပြိုင်ပွဲ နှစ်ခု ယှဉ်ပြိုင်ရမည် ဖြစ်ပြီး ပထမဆုံးပြိုင်ပွဲအဖြစ် အာဆီယံပြိုင်ပွဲ ယှဉ်ပြိုင်ရမည်ဖြစ်သည်။ မြန်မာ ယူ-၁၉ အမျိုးသမီး အသင်းကို ဒေါ်သက်သက်ဝင်းက နည်းပြချုပ်အဖြစ်ကိုင်တွယ်နေပြီး ပဏာမ ကစားသမား ၃၀ ကျော်ဖြင့် ဖွဲ့စည်းထားသည်။